DILI (timorpost.com) – Governu liuhusi Ministériu Agrikultura no Peskas (MAP) ho Ministériu Saúde (MS) no Parseiru Internasional Menzies School of Health Research diskute asuntu kona-ba halo prevensaun ba moras Brucelose.
“Ita halo diskusaun ida ne’e au-mezmu tempu halo lansamentu hodi diskute asuntu oinsá atu halo prevensaun ba moras Brucelose ne’ebé akontese ba animal hanesan Karau Vaka bele mós afeta ba ema ne’ebé kontaktu ho animal bele hetan moras,” Diretora nasionál veterináriu MAP, Joanita Bendita, hateten ba jornalista sira iha salaun Institutu Nasionál Saúde Públiku Ministériu Saúde, Komoro, Tersa (20/06).
Tanba ne’e mak MAP ho MS halo diskusaun loron tomak ne’e hodi halo preparasaun hodi prevene moras refere liuhusi vasinasaun no halo diagnóstiku ba iha animal Karau Vaka.
Nia dehan, Governu iha planu ba futuru sei koloka médiku veterináriu no pesoál saúde no médiku espesialista husi Mensis sei halo tratamentu ba animal hotu-hotu nia saúde ho di’ak atu nune’e bele kombate ba moras refere.
Nia hatete, ohin loron ne’e hamutuk ho parseiru sira hodi diskute hodi fó hanoin ba malu oinsá maka ba futuru bele halo prevensaun liuhusi asaun saida hodi bele redús risku ba iha moras refere.
Tuir nia, liuhusi projetu ida ne’e mak bele hatene oinsá atu bele foti amostra liuhusi halo vasinasaun ba iha Karau sira liuhusi teste laboratóriu veterináriu nian ne’ebé daudaun ne’e implementa ona, tanba hela apoiu fundu husi parseiru Mensis.
“Ita espera katak husi diskusaun ida ne’e bele lori rezultadu di’ak hodi dezenvolve liuhusi halo diagnóstiku no foti amostra atu nune’e iha futuru bele aplika ona vasinasaun ba animal Karau Vaka hodi redús moras Brucelose”, nia hateten.
Iha fatin hanesan, prezidente Institutu Nasionál Saúde Públiku Ministériu Saúde, Merita Monteiro, hatete, servisu hamutuk ho MAP ho parseiru One Health halo lansamentu au-mezmu tempu halo diskusaun kona-ba oinsá atu prevene moras Brucelose iha Timor-Leste.
Nia dehan, diskusaun ne’e hanesan etapa primeiru ne’ebé aprezenta relatóriu peskiza husi Ministériu Saúde no MAP ne’ebé durante ne’e halo iha terenu hatudu katak moras ne’e akontese duni iha Timor-Leste.
Tanba ne’e, presiza ministériu relevante atu halo intervensaun ba moras refere liuhusi vasinasaun no mós halo kontrolu no diagnóstiku ba moras Brucelose iha animal Karau Vaka.
Tuir nia, durante ne’e sira seidauk deteta ema no animál balun hetan moras Brucelose, maibé nafatin esforsu hodi halo vasinasaun hodi prevene karik akontese iha futuru.
Maibé, daudaun ne’e MS seidauk iha laboratóriu oinsá espesífiku ida kona-ba oinsá atu identifika ema hetan moras Brucelose ne’ebé da’et husi animal Karau nian.
Enkuantu, moras refere afeta husi animal Karau, maibé moras ne’e bele afeta ba ema ne’ebé hela iha area rurais liuhusi isin manas ne’e bele hatene ona katak moras Brucelose.
2,838 total views, 3 views today
Bele hare Video Seluk :
Subscribe to Timorpost
