BAUCAU, 10 marsu 2022 (TATOLI) – Organizasaun Menzies School of Health Research (MSHR) apoia mákina haat kompostu hosi bactec, microscope, Biosafety Cabinet no inkubatór ba laboratoriu Hospital Rejionál Eduardo Ximenes (HOREX) Baucau hodi fasilita serbisu antendimentu teste raan.
Carlos Sarmento nu’udar Project manager Fleming Fund MSHR, esplika objetivu apoia mákina ne’e atu reforsa serbisu laboratóriu iha HoREX ho funsaun bactec atu análize infesaun raan, mikroskópiu atu analiza baktéria, gabinete ba bioseguransa (Biosafety Cabinet) nia funsaun atu prosesa amostra mikrobiolojia no inkubatór ho funsaun asegura amostra.
“Hosi apoiu ne’e atu haforsa serbisu laboratóriu HoREX nian hodi atende pasiente sira,” Carlos Sarmento ko’alia iha Vila Nova, kinta ne’e.
Mákina hirak-ne’e apoia hosi Reuni Unidu liuhosi organizasuan MSHR rezultadu hosi kooperasaun ho governu Timor-Leste no sei kontinua kapasitasaun hosi organizasaun MSHR ba pesoál saúde sira nune’e bele fasilita lalais utilizasaun iha labotóriu
.
xefe Departamentu Laboratóriu HoREX Baucau, José Martins Sarmento, hateten, mákina hirak- ne’e responde ona atendimentu pasiente sira-ne’ebé sei hala’o tratamentu iha HoREX tanba kapasidade mákina hirak-ne’e loron-ida bele deteta amostra raan hamutuk haat-nulu.
“Agora daudaun bele responde ona nesesidade tratamentu iha ita-nia laboratóriu HoREX Baucau,” nia katak.
Durante ne’e pesoal saúde iha laboratóriu HoREX utiliza ekipamentu manuál nune’e difikulta durasaun análize raan tanba ne’e ho mákina dijitál ne’e bele aselera prosesu analiza amostra.
Jornalista : Natalino Belo
Editór : Evaristo Soares Martins
